मंडळी एकनाथ शिंदेच्या बंडानंतर महाराष्ट्रातल्या जनतेनं अजित पवारांच्या माध्यमातून पुन्हा एकदा सत्तासंघर्ष अनुभवला. अजित पवारांच्या ह्या टोकाच्या पाऊलामुळे राष्ट्रवादी काँग्रेसची दोन गटांत विभागणी झाली. एक म्हणजे राष्ट्रवादीचा शरद पवार गट आणि दुसरा म्हणजे अजित पवारांसोबत गेलेल्या आमदारांचा गट. त्यामुळे आता असा प्रश्न निर्माण झालाय की राष्ट्रवादी काँग्रेस पक्ष आणि त्या पक्षाचं घड्याळ हे निवडणूक चिन्ह नेमकं कोणाचं ? आता त्याप्रकरणी काल महत्त्वाच्या अशा दोन सुनावण्या पार पडल्या. एक म्हणजे शरद पवार गटानं दाखल केलेली अजित पवार गटाविरोधातली सर्वोच्च न्यायालयातली याचिकेची सुनावणी आणि दुसरी राष्ट्रवादी पक्ष आणि चिन्हाबाबत निवडणूक आयोगात काल पार पडलेली सुनावणी. त्यामुळे या दोन सुनावण्याचा अंतिम निकाल काय लागतोय यावर नक्कीच सर्वांचंच लक्ष असणारे. मंडळी आता तस बघायला गेलं तर अजित पवार गटाच्या म्हणण्यानुसार राष्ट्रवादीच्या एकूण आमदारांपैकी 43 आमदार हे त्यांच्या सोबत आहेत. या आकड्यामुळे अजित पवारांची ताकद जरी आपल्याला जास्त वाटतं असली तरी शरद पवारांना सगळे सोडून जातं असताना उरलेले 11 आमदार मात्र त्यांच्याशी एकदम कट्टर आणि एकनिष्ठ आहेत. आता मग ते 11आमदार नेमके आहेत तरी कोण आणि कोणत्या गोष्टींमुळे त्यांनी पवारांची साथ सोडलेली नाहीये ? हेच आपण आजच्या Bolg च्या माध्यमातून जाणून घेणार आहोत.
(Ajit Pawar Bandkhori | Sharad Pawar Resigns | Vishaych Bhari)
तर बघा शरद पवारांचे सगळ्यात पहिले जवळचे आणि विश्वासु आमदार आहेत त्यांचेच चुलत नातू आणि अजित पवारांचे चुलत पुतणे कर्जत – जामखेडचे आमदार रोहित पवार.
रोहित पवार यांनी मॅनेजमेंट मधून शिक्षण पूर्ण करून बारामती ऍग्रोची निर्मिती केली. त्यांनतर बारामतीमधल्या गुणवडी गटातून ते जिल्हापरिषदेवर निवडून आले आणि शरद पवारांच्याचं मार्गदर्शनात त्यांनी आपल्या राजकीय करिअरला सुरुवात केली. पुढे 2019 ला कर्जत जामखेडमधून भाजप आमदार राम शिंदे यांचा पराभव करून ते आमदार झाले. आता अजित पवारांच्या एकूण सत्त्तानाट्यानंतर रोहित पवार यांनी आपल्या आजोबांची म्हणजेच शरद पवारांची साथ द्यायची ठरवलंय. अगदी अशा परिस्थितीत ते त्यांच्यासोबत उभे सुद्धा राहिलेत. एवढंच काय तर शरद पवार गटातून अजित दादा गटाविरोधात सर्वात आक्रमक भूमिका घेणारे ते नेते सुद्धा बनलेले आहेत.
(Ajit Pawar Bandkhori | Sharad Pawar Resigns | Vishaych Bhari)
त्यानंतर दुसरे आमदार आहेत जयंत पाटील.
मंडळी जयंत पाटील अगदी 1990 पासून इस्लामपूर वाळवा मतदारसंघांचे आमदार आहेत. मागं काही दिवसांपूर्वी जेव्हा शरद पवार यांनी राष्ट्रवादीच्या अध्यक्षपदाचा राजीनामा दिला होता तेव्हा सगळ्यात पहिल्यांदा डोळ्यात अश्रू आलेला नेता म्हणजे जयंत पाटील होते. ईडीची कारवाई होऊनसुद्धा जयंत पाटलांनी शरद पवारांची साथ अजिबात सोडलेली नाही. 2018 पासून शरद पवारांनी जयंत पाटलांवर राष्ट्रवादीच्या प्रदेशाध्यक्ष पदाची जबाबदारी टाकली होती. जयंत पाटील वेळोवेळी त्यांच्या बोलण्यातून शरद पवारांशी त्यांची असलेली निष्ठा दाखवून देतात. शरद पवार यांच्यानंतर राष्ट्रवादीमध्ये सगळ्यात मुत्सद्दी नेता म्हणून त्यांची ओळखय. अशा परिस्थितीत राष्ट्रवादी काँग्रेस हा पक्ष शरद पवार यांचाच आहे. पक्षाची पायाभरणी त्यांनी केली आहे. देशातील बहुसंख्य कार्यकर्ते त्यांच्याबरोबर आहेत. त्यामुळे वेगळा निर्णय होणार नाही, अशी आमची अपेक्षा आहे, अस जयंत पाटील म्हणाले. त्यामुळं येत्या काळात सोडून गेलेल्या आमदारांचा correct कार्यक्रम करण्यात जयंत पाटील हे मागे राहताना दिसणार नाहीत.
(Ajit Pawar Bandkhori | Sharad Pawar Resigns | Vishaych Bhari)
मंडळी त्यानंतर तिसरे आमदार आहेत मुंब्रा विधानसभेचे आमदार जिंतेन्द्र आव्हाड.
आपल्या सडेतोड भाषणशैलीमुळं विरोधकांना शिंगावर घेणाऱ्या जिंतेन्द्र आव्हाड यांनी एकदा आपल्या भाषणात बोलताना शरद पवारांनी मला राजकारणात आणलं, निदान गिरणी कामगाराच्या मुलाला कोण नेता करतो, त्यामुळं शरद पवार माझ्यासाठी विठ्ठल आहेत असं म्हणत शरद पवारांची मर्जी संपादन केली होती. अनेकवेळा ते शरद पवारांवर बोलताना भावनिकही झाले होते. आव्हाडांची हीच निष्ठा त्यांच्या कामी आली कारण अजित पवारांच्या बंडानंतर शरद पवारांना त्यांनी तातडीने विरोधीपक्षनेते पदी बसवण्याचा निर्णय घेतला. तसचं पक्षाच्या नवीन पक्षप्रतोदपदी ही त्यांचीचं निवड केली. त्याचबरोबर अजित पवारांसोबत त्यांचं फारस काही जमत नाही कारण आव्हाडांनी ठाण्यातली पक्षसंघटना संपवल्याचा आरोप एकदा अजित पवारांनी भर सभेत केला होता. त्यामुळं पक्षातलं जितेंद्र आव्हाड यांचं महत्व शरद पवारांच्या आशीर्वादामुळेच टिकूनयं असं म्हणल तरी वावगं ठरणार नाही.
(Ajit Pawar Bandkhori | Sharad Pawar Resigns | Vishaych Bhari)
पुढच्या चौथ्या आमदार आहेत तासगाव कवठे महाकाळच्या आमदार सुमनताई पाटील.
मंडळी सुमनताई पाटील या राष्ट्रवादीचे दिवंगत नेते आर आर पाटील यांच्या पत्नी आहेत. आबांच्या निधनानंतर सुमनताई तासगाव – कवठे महाकाळ विधानसभा मतदारसंघातून निवडून आल्या. त्यासाठी त्यांना आणि आर आर आबा पाटील यांचे चिरंजीव रोहित पाटील यांना राजकीय पाठबळ हे शरद पवारांनीचं दिलं होतं. त्या जोरावरच तर आता रोहित पाटील यांनी 2022 साली कवठे महाकाळ नगरपंचायत आणि आता तासगाव बाजार समिती काबीज केलीय. बाकी सुमनताई पाटील किंवा पाटील घराण हे अजितदादा गटासॊबत जाण तस अशक्यप्राय मानलं जातं. कारण असं करण म्हणजे त्यांच्यासाठी आत्मघातकी ठरेलं. त्यामुळ शरद पवारांसोबतच राहणंच त्यांनी पसंत केलंय.
(Ajit Pawar Bandkhori | Sharad Pawar Resigns | Vishaych Bhari)
पाचवे आमदार आहेत काटोल विधानसभा मतदारसंघांचे आमदार अनिल देशमुख.
अनिल देशमुख म्हणलं की सर्वात पहिल्यांदा त्यांच कथित वसुली प्रकरण समोर येत ज्यामुळे त्यांना त्यांच्या गृहमंत्रीपदाचा राजीनामा द्यावा लागला आणि जेलमध्येही जावं लागलं. तस तर ईडीच्या भितीनं अनिल देशमुख यांनी अजित पवार गटात जायला हवं होत. पण त्यांनी तस केलं नाही. त्याचं कारण म्हणजे त्यांचा मतदारसंघ. मंडळी अनिल देशमुख हे राजकारणात आले ते अपक्ष म्हणून. 1995 ला काँग्रेसनं त्यांना उमेदवारी नाकारली, पण 1999 ला जेंव्हा राष्ट्रवादी स्थापन झाली तेंव्हा पवारांनी मात्र त्यांना संधी दिली आणि 2014 ते 2019 हा काळ सोडून ते काटोल मतदारसंघातून सलग निवडून आले. अगदीच काय तर पवारांनी त्यांच्या पक्षातल्या अनेक दिग्गज नेत्यांना सोडून अनिल देशमुखांना गृहमंत्रिपद दिलं. दुसऱ्या बाजूला आता काटोल मतदारसंघातुन अनिल देशमुखांचे विरोधक समजले जाणारे आशिष देशमुख हे 2024 ला भाजपकडून निवडणूक लढवण्याचे संकेत आहेत. त्यामुळे काटोल मतदारसंघातली उमेदवारी वाचवण हे देशमुखांसाठी मस्ट असणारे. त्यामुळेचं त्यांनी शरद पवारांसोबत जाण पसंत केलं असावं असं काही जाणकारांच म्हणणंय. पण सगळ्यात महत्वाचं म्हणजे अनेकांच्या मते मुळातच अनिल देशमुख हे पवारांचे विश्वासू नेते मानले जातात.
(Ajit Pawar Bandkhori | Sharad Pawar Resigns | Vishaych Bhari)
यानंतर सहावे आमदार आहेत महाराष्ट्राचे माजी आरोग्यमंत्री राजेशजी टोपे.
ते घनसावंगी मतदारसंघातून 1999 पासून सलग 5 टर्म झाले राष्ट्रवादी काँग्रेसच्या तिकिटावर आमदार म्हणून निवडून येतायत. सध्याला त्यांनी शरद पवार गटासॊबत राहणं पसंत केलय. त्याचं कारण म्हणजे आमदार राजेश टोपे आणि त्यांचे वडील अंकुशराव टोपे हे अगदी काँग्रेस काळापासूनच पवारांशी निष्ठा राखून आहेत. दुसऱ्या बाजूला मागे लोकसभा निवडणुका झाल्यानंतर अजित पवार हे टोपेंवर नाराज असल्याची चर्चा होती. त्याचं कारण म्हणजे परभणी लोकसभा मतदारसंघात असलेल्या टोपेंच वर्चस्व असणाऱ्या घनसावंगी मधून राष्ट्रवादी काँग्रेसचे राजेश विटेकर यांना तितकीशी मत मिळाली नव्हती आणि म्हणूनच राजेश विटेकरी यांचा पराभव झाला. यावरूनचं अजित पवार हे टोपे यांच्यावर नाराज असल्याची चर्चा होती. त्यामुळेच विधानसभा निवडणूकीत राजेश टोपे यांच्या उमेदवारी अर्ज भरण्याच्या दिवशी अजित पवार यांनी उपस्थित राहण्यास नकार दिला होता. ह्याच काही कारणामुळे राजेश टोपे हे शरद पवारांसोबत आहेत.
(Ajit Pawar Bandkhori | Sharad Pawar Resigns | Vishaych Bhari)
यानंतर पुढचे सातवे आमदार आहेत आमदार बाळासाहेब पाटील.
मंडळी आमदार बाळासाहेब पाटील हे कराड उत्तरचे आमदार आहेत आणि त्यांनी आपण शरद पवारांच्याच भूमिकेसोबत असल्याचं स्पष्ट केलंय. बाळासाहेब पाटील हे 1999 पासून इथं सलग आमदार आहेत. तस तर कराडच्या एकूण राजकारणावर यशवंतराव चव्हाण यांच्यामुळे शरद पवारांचाच प्रभाव राहिलेला आहे. पण दुसऱ्या बाजूला शरद पवार ज्या रयत शिक्षण संस्थेचे अध्यक्ष आहेत त्या संस्थेत बाळासाहेब पाटील हे सुद्धा संचालक आहेत. त्यामुळे संस्थेतले शरद पवारांचे पाटील यांच्याशी हितसंबंध चांगले आहेत. त्यामुळेच कदाचित अजित पवारांचा फोन येऊन सुद्धा बाळासाहेब पाटलांनी शरद पवारांनसोबतचं राहण्यासाठी पसंती दिलीय.
(Ajit Pawar Bandkhori | Sharad Pawar Resigns | Vishaych Bhari)
पुढचे आठवे आमदार आहेत पालघरचे सुनील भुसारा.
2019 साली पालघरच्या विक्रमगड विधानसभा मतदारसंघातून सुनील भुसारा निवडून आले. खरंतर या मतदारसंघात भाजपचच पहिल्यापासून बलाबल राहिलेलंयं. पण तरीसुद्धा भाजपच्या डॉक्टर हेमंत सावरा यांचा त्यांनी पराभव केला. मंडळी हेमंत सावरा यांचे वडील माजी मंत्री विष्णू सावरा हे या मतदारसंघातून 2014 साली आमदार होते. पण विष्णू सावरा यांची प्रकृती खालवल्यामुळं 2019 त्यांचे चिरंजीव डॉक्टर हेमंत सावरा यांना तिकीट देण्यात आलं. यंदा सुद्धा त्यांना उभं करण्यासाठी भाजप पाठबळ देतंय. अगदीच काय तर त्यांची उमेदवारी सुद्धा फिक्स झाल्यात जमाय. त्यामुळ सुनील भुसारा यांना सुद्धा या मतदारसंघातून आपली उमेदवारी वाचवण मस्ट असणारे. त्यातच अजित दादा गट फुटल्या फुटल्याच आपण शरद पवारांसोबत आहोत अशी थेट रोखठोक भूमिकाचं सुनील भुसारा यांनी घेतलेली होती. अनेकदा ते अजित दादांच्या संपर्कात असल्याचं बोललं जातं होत. पण वेळो वेळोवेळी त्यांनी आपण शरद पवारांसोबत असल्याचचं सांगितलं.
(Ajit Pawar Bandkhori | Sharad Pawar Resigns | Vishaych Bhari)
यानंतर नववे आमदार आहेत प्राजक्त तनपुरे.
मंडळी प्राजक्त तनपुरे हे नगर जिल्ह्यातल्या राहुरी विधानसभा मतदारसंघाचे आमदार आहेत. 2019 च्या निवडणुकी मध्ये ते या मतदारसंघातून निवडून आले होते. प्राजक्त हे तनपुरे घराण्यातले तिसऱ्या पिढीचे तरुण नेते आहेत. त्यांचे आजोबा हे 2 टर्म तर वडील 5 टर्म इथून आमदार होते. त्यांचे वडील प्रसाद तनपुरे हे एक टर्म खासदार सुद्धा झालेलेयेत. विशेष सांगायचं म्हणजे प्राजक्त तनपुरे यांच्या आई डॉक्टर उषा तनपुरे या राष्ट्रवादीचे ज्येष्ठ नेते जयंत पाटील यांच्या सख्ख्या भगिनी आहेत. म्हणजेच कायं तर प्राजक्त तनपुरे हे जयंत पाटील यांचे भाचे आहेत. असं बोललं जातं कीं कदाचित त्यामुळेचं प्राजक्त हे पहिल्यांदाच आमदार झाले आणि पहिल्याच झटक्यात ते राज्यमंत्रीही झाले. दुसरं म्हणजे तनपुरे घराण्याची इतकी मोठी कारकीर्द असून सुद्धा त्यांना आजवर कधीच मंत्रिपद दिलं गेलं नव्हतं. म्हणून त्यांच्याकडे नगरविकास, ऊर्जा, आदिवासी, उच्च व तंत्र शिक्षण, आपत्ती व्यवस्थापन आणि मदत व पुनर्वसन या पाच खाती असलेल्या राज्यमंत्रीपदाची ही जबाबदारी देण्यात आली. या काही कारणांमुळे सध्याच्या परिस्थितीला प्राजक्त तनपुरे यांनी मात्र आपले मामा जयंत पाटील यांच्यासोबतच राहण्याचा निर्णय घेतलाय.
(Ajit Pawar Bandkhori | Sharad Pawar Resigns | Vishaych Bhari)
मंडळी शरद पवारांसोबत कट्टर असणारे 10 वे आमदार आहेत बीड मतदारसंघांचे आमदार संदीप क्षीरसागर.
2019 ला आपले काका जयदत्त क्षीरसागर यांना नमवून संदीप क्षीरसागर हे आमदार झाले. तस तर संदीप क्षीरसागर यांना राजकारणात आणण्याचं श्रेय अजित पवारांना जातं पण तरीसुद्धा आमदार झाल्यावर मात्र संदीप क्षीरसागर हे शरद पवार यांच्या छत्रछायेखाली वाढले. आता बीड जिल्ह्यात राष्ट्रवादीचा प्रमुख चेहरा म्हणून धनंजय मुंडे यांच्याकडे बघितलं जातं. पण धनंजय मुंडे यांनी अजित दादांसोबत जायचं ठरवल्यामुळे शरद पवार यांनी बीडमध्ये सभा घ्येतली. त्यामुळे बीडचं नेतृत्व करण्याची संधी आता संदीप क्षीरसागर यांच्याकडे चालून आलेलीये. एकूणच याचमुळे संदीप क्षीरसागर यांनी शरद पवारांसोबत राहणं पसंत केलंय.
(Ajit Pawar Bandkhori | Sharad Pawar Resigns | Vishaych Bhari)
यानंतर अकरावे आमदार आहेत अशोक पवार.
मंडळी अशोक पवार हे पुण्याच्या शिरूर हवेली मतदारसंघांचे आमदार आहेत. ते घोडगंगा साखर कारखान्याचे चेअरमनसुद्धा आहेत. तस तर अशोक पवार हे अजित दादांच्या शपथविधी सोहळ्यावेळेस उपस्थित होते. पण तीन दिवसांनी मात्र त्यांनी अचानक भूमिका बदलत आपण शरद पवारांसोबत असल्याचं सांगितलं. या सगळ्या सत्तनाट्यानंतर त्यांनी अजित दादा गटांन आमच्या खोट्या सह्या घेतल्या असं सांगितलं आणि ते वाय बी सेंटरला सुद्धा उपस्थित राहिले.
(Ajit Pawar Bandkhori | Sharad Pawar Resigns | Vishaych Bhari)
हे पण विषय भारी वाच भाऊ
वंचितला सोबत घेतलं नाही तर कांग्रेस राष्ट्रवादीचे हे ८ नेते पडतील | Prakash Ambedkar vs Sharad Pawar
भाजपचे हे ५ नेते Sharad Pawar गटात जातील | Devendra Fadnavis | Eknath Shinde | Vishaych Bhari
तर बघा आता हे 11 आमदार त्यांच्या लोकल politics मधील राजकीय अपरिहार्यतेमुळे म्हणा किंवा शरद पवारांच्या निष्ठेमुळे आज शरद पवार गटासोबत एकनिष्ठ आहेत. यांच्याशिवाय विधानपरिषद आमदार शशिकांत शिंदे, खासदार अमोल कोल्हे ही देखील काही निष्ठावंत नेत्यांची उदाहरणं आहेत. पण पुढं जाऊन कोण पवारांची किती साथ देणार हे येणारा काळचं ठरवेल. असो, बाकी पडत्या काळात शरद पवार यांच्याशी निष्ठा ठेवलेल्या आमदारांबद्दल आणि कार्यकर्त्यांबद्दल तुमची मतं नेमकी काय आहेत त्ये आम्हाला कमेंट करून नक्की सांगा.
Please follow us on Facebook – Our Page Link : 👇👇
https://www.facebook.com/vishaychbhari
https://www.facebook.com/aplavishaychbhari
Leave a Reply Cancel reply